လေးတူချင်းလူမျိုးများတွင် အောက်ဖော်ပြပါအတိုင်း မတူညီသော ရိုးရာယဉ်ကျေးမှု ဝတ်စုံနှစ်မျိုး ရှိသည်။ လေးတူချင်းလူမျိုးများသည် ဝတ်စုံဝတ်ဆင်ရာတွင် အလွန်တိကျပြတ်သားသော ခွဲခြားမှု ရှိကြသည်။ အမျိုးသားများသည် အမျိုးသမီးဝတ်စုံများကို မည်သည့်အခါမျှ ဝတ်ဆင်လေ့မရှိပါ။

က။ အမျိုးသားဝတ်စုံများ

၁။ Khrangim သို့မဟုတ် Phangim

လေးတူအမျိုးသား ဝတ်စုံကို "khrangim (သို့မဟုတ်) phangim" ဟု ခေါ်ဆိုသည်။ ဤရိုးရာရက်ထည်တွင် အနီရောင် အဓိကပါဝင်ပြီး ၅ ရာခိုင်နှုန်းခန့်မှာ အနက်ရောင် ဖြစ်သည်။ အင်္ကျီကိုယ်ထည်တစ်လျှောက်တွင် ပုတီးစေ့များ၊ ကတ်စပါးခရုခွံများ (သို့မဟုတ်) ပုလဲများကို သီကုံး၍ တန်ဆာဆင်ထားသည်။

၂။ Yënlupong ရိုးရာခေါင်းပေါင်း 

"ယင်းန်လူပန်း" သည် ပွဲတော်ရက်ဖြစ်စေ၊ ရိုးရာယဉ်ကျေးမှုဆိုင်ရာ အခမ်းအနားအသေးလေးတစ်ခု ဖြစ်စေ လေးတူအမျိုးသားတိုင်း မရှိမဖြစ် ဆင်ယင်ရမည့် အသုံးအဆောင်တစ်ခု ဖြစ်သည်။ ၎င်းသည် အနီရောင်သက်သက် ဖြစ်ပြီး ဘေးပတ်ပတ်လည်တွင် ၇ ရာခိုင်နှုန်းခန့်ရှိသော အဖြူရောင်မျဉ်းနှစ်ကြောင်း ပါရှိသည်။

၃။ ဟွမ် ခေါင်းပေါင်း 

ဤအရာသည်လည်း အမျိုးသားများအတွက် ခေါင်းပေါင်းတစ်ခု ဖြစ်သော်လည်း အနည်းငယ် ရှားပါးသည်။ ထို့အပြင် ဤခေါင်းပေါင်းကို ဝတ်ဆင်နိုင်သူမှာ အခြားသူများထက် ပိုမို၍ ဂုဏ်သရေရှိပြီး အဆင့်အတန်းမြင့်မားသော ပုဂ္ဂိုလ်ဖြစ်ကြောင်းကိုလည်း အဓိပ္ပာယ်ရသည်။ ဤအသုံးအဆောင်ကို လေးတူချင်းလူမျိုးများအကြား ကြီးကျယ်သော အခမ်းအနား သို့မဟုတ် ရိုးရာယဉ်ကျေးမှုပွဲတော်များ ကျင်းပသည့် အခါမျိုးတွင်သာ အသုံးပြုကြသည်။

 ၄။ Yën ရိုးရာလွယ်အိတ် 

လေးတူအမျိုးသားများသည် "ယင်းန်ဂျီခီ" ဟုခေါ်သော ရိုးရာလွယ်အိတ်ကိုလည်း အသုံးပြုကြသည်။ ၎င်းသည် သေးငယ်သော်လည်း မရှိမဖြစ် လိုအပ်သော ရိုးရာအသုံးအဆောင်တစ်ခုအဖြစ် သတ်မှတ်ထားသည်။ လွယ်အိတ်၏ အစိတ်အပိုင်းအများစုမှာ အနီရောင်ဖြစ်ပြီး အဖြူရောင်နှင့် တစ်ခါတစ်ရံ အနက်ရောင်လိုင်းများဖြင့် ပုံဖော်ထားသည်။

ခ။ အမျိုးသမီးဝတ်စုံများ 

၁။ Khranghën သို့မဟုတ် Phanghën

ဤအရာသည် အမျိုးသမီးရိုးရာဝတ်စုံ သို့မဟုတ် အင်္ကျီ (တူနစ်) ဖြစ်သည်။ ၎င်းတွင် ကတ်စပါးခရုခွံများ (သို့မဟုတ်) ခရုခွံကြယ်သီးများဖြင့် တန်ဆာဆင်ထားသည်။ ရက်ထည်၏ အရောင်များမှာ အနီရောင် ၆၅ ရာခိုင်နှုန်းနှင့် အနက်ရောင် ၃၅ ရာခိုင်နှုန်း ပါဝင်သည်။ 

၂။ ဟိုဒက်ပ်၊ ပွန်ပြာ နှင့် ကစ်ကီ (Hodëp & Ponpya, Kikki)

အမျိုးသမီး သို့မဟုတ် မိန်းကလေးတစ်ဦး ဝတ်ဆင်သည့်အခါ ခါးတွင် ပတ်ရသည့် ထဘီ၏ အစိတ်အပိုင်းနှစ်ခု (သို့မဟုတ်) အထည်နှစ်စ ဖြစ်သည်။ "ဟိုဒက်ပ် (Hodëp)" သည် ရိုးရာအတိုင်း လက်ရက်ကန်းဖြင့် ရက်လုပ်ထားပြီး အများအားဖြင့် အနက်ရောင် ဖြစ်သည်။ "ပွန်ပြာ (Ponpya)" သည် စက်ရက်ကန်းဖြင့် ရက်လုပ်ထားသော မြန်မာ့ရက်ထည်ဖြစ်ပြီး အနီရောင် သို့မဟုတ် ကြိုက်နှစ်သက်ရာ အရောင်တစ်မျိုးမျိုးကို အသုံးပြုနိုင်သည်။ "ကစ်ကီ (Kikki)" မှာမူ ဟိုဒက်ပ်နှင့် ပွန်ပြာတို့ကို တွဲဖက်ချည်နှောင်ရန် အသုံးပြုသည့် ခါးပတ်ဖြစ်သည်။

၃။ငွေသတ္တုဖြင့် ပြုလုပ်သော နားတောင်း (Hën Nhawtheng)

ဤအရာသည် မိန်းကလေးများ သို့မဟုတ် အမျိုးသမီးများ ဆင်ယင်သည့် ငွေဖြင့် ပြုလုပ်ထားသော နားတောင်းများ ဖြစ်သည်။