Pui Yjng Tuikom Khui 

Letu hyju yxyanglheq khrawng sjmlongko, Kyalongko, Vaplongko, Phunglungko, Pongleko, Cxngko na Telongko va an mji.

Lon hxttiq khokum kra koq bawngnga, Letu hyju yxyanglheq pjpjiq khrawng  kyatui na Sidoktaya kakra-jngkxq Mung tuiko vjngkxqthjq mjitiq sjmsxpkaw Puiye yjng bjk thequna sjmsxp kawva an kom. 

Pui yjng tui an kom khrawng nga a thonne. Pam cä puiye hawnna mjiqtiq kongdju a si. Jnnjng, “pui yjng han kom, pam mjng han kraw,” tiyjng kheukhaw a mji. 

Ni hyjulheq khrawng cung ngjng, mju vjng, tuiko-hawlong, dyä, uithe, Yaqhen, Mhaw lheq jng tuikomtiq lheqa an thonne. Pawsawng/Pawcong sokci yjng sommë thequna lodxn na tucaw tiyjng om-nawi yxyang ha an mji. 

Sjmlongkova ce Senu cung cungnawtiqlheq pawsawng sok an mji. Tuqacä Sjmlongkokhodekka a cyä yxyanglhiq ha këmpaw kung an mji. Kyalongkova cä, Buzo yxyanglheqna Pëknu cung mawqlheq an mji. Lyäcaw, Heu, Kuli, Poklhxnlheq, etc…an mji

Senu cung lamyava mjitiqlheqa sjmyalheq an nawk, kyalongko, yelongko lamma mjitiqlheqa tuiyalheq tina an hawu. Tuiya na sjmya lheq khrawng/khawng an be mëqcaw a kauve.

Sjmlongkova deketiqlheqa Doitu tina ha an hawu. I nawkhxce, doi yo/yomdoi cjtnawk khova mjitiqlheq ti. 

Khut cä lju khut an bi, kong khut tiyjng ha an hawu. Hjmmace, putawlheqna tju khut ha an bi, nice mhusx khutta a thonne. 

Telongko na vaplongko va mjiqtiqlheq cä hjmma, vawknghawt Sjmsxp, Kyalong ngjngkxq thjq Yesip, Naiye tjng kom thequna Vapsxp, Mawngtun na Pacung kuawqkrava khokum hombawngvëq mji hxt thequna Telongko lamma an krong. Anlheqcä Daitu tinaha an hawu. Doitu vjng ni ming a ljuqve.

Phunglongkova mjitiqlheq cä Buddhakamaq ka-a longtiq Muawlong  ngjng thok thequna jnnjngkxqthjq yophong cuntiqlheqa a thonne. Nilheqa Mangun yxyang na Lai yxyang tiyjng an kabatx. Mangun pawsawng sok an mji, Lai ha pawsawng sok an mji bawkhin. Hyjudek Platewa luqpjngnga Mangunlhiq këmpaw mji thequna Lakhjng luqpjng, Vawdekka Lai yxyanglheq këmpaw an mji. 

Ponglekova mjitiq Letu hyjuyx Lailheq cä, Vaplam mjngkxqthjq cxngnam sxpkaw, cxngmawye yjng bjk thequna jn dekka mjitiqlheqa a thonne. Ni Lailheq ha pawsawng sok an mji. Nhetiq cung cä Pjknu cung sitheqna an tuiko cä Khalong a si. 

Lakhjng manglhiqna Lakhjng luqa, nawn an om hxva, Phunglongko dawicum(tuqa Lakhjnglhiq namlen), sangj dxnlhiqa an mji hxt. Ponglekova Lainam khrawng cxcxk mji hxttiq nam tiyjng an hawu soi. 

Pui yjng tuikom khui cä ni hyawqdj, a toitxtta a yo-oi khrawngnga a thonne. 

Letu hyju tjngna tuikom khui phi-yi bjiqsaq.