Letu hyju bonglhiq dukka këmpaw mjitiq thumcën, Be(khëukhaw) na hjmmjngkxq cxmme khrawnglheq cxm nawk kai tok digital imlen, letu.ethnosites.com ma kan djudawng.
Kihi Lhiq (Who we are)
Letu.ethnosites.com khrawng, hihi letulhiq Be, yum khrawng, thumcën na tun-nguawq, mjiqcoq khrawnglhiq yokkai, phjuvai tokka poqoitiq, "letu.ethnosites.com" website a si.
Kihi Letuhyju community members lheq na kan cailaq khrawng cä, u nghawt tokk dj: Letu hyju bongbawilhiq yunne khrawng hjmcanglheq sin hxt khrawng thumcënlhiq, hihi thai na hihi identity lhiq khrxq yaq ai si theqna somdek pjpjiq yjngkxq khrawnglheq naha nilhiq a philaq nawkkai dxn nghawtta a thonne.
Kihi Mang(Our Vision)
Be na thuncën lhiq khrawng hjmmjngkxqthjq dxmcek mji soitiq si yju hjiq. Nihjiq khrawng hëngtiq identity lhiq si theqna soilhëngngecek dj a hiq hëng.
Ni website kjngkxq, kihina pyanamma mjiqtiq Letulhiq thai pju mhawn pui yai, nu-paw be coksawng ngai, hihi yxyang ngjng solhëngngetiq research poqcai tiqlhiqa lam dawn pettai si theqna somdek cucuva khraiqtiq bongbawilhiqa pumhaw mjiqcoq, thonne khëu khrawnglhiq sotjuq nawk imkjtta thonne yai kan nxn.
Nang khrawng na pumhaw yxyanglhiq Letu Community si ti si, siyaqna nxtcawkphatiq kihi nupaw thumcënlheq phi dawn ti tiq global imcengpui si ti si - ni dxnna sui-so yokkai, coksawngnge theqna kihi dj len haq ai djudawng dang kan ti.
Kihi Poqcai Yai (Our mission)
Mawlawm mjng loväqtiq khukbonglhiq tok hihi yungtuawq khrawng identity ljuqvai na cxmmai, pjnnnjngcä hihi Letu hyju bonglheq khrawng yawu kakaitiq sodek kjng/dj so pettiq, a tha mjitiq digital krawk hyawng nghawt sui pet tai a si. Khlawng tjngna saba-ai khui ming nghawt ci a tawkke nawk khrawng na cxmme yaiya tawnnetiq thumcën u nghawt ci a mji nawk khrawng kihina kan yum.
Kihi poqcai yailheq cä: hjmcanglheq cxmme khrawng, sin hxt khrawnglhiq, pumhaw yxyang ngjng soiyetiq khëukhaw vjng hawu/sa khrawng lhiq na hihi community mji mhawnna somlhën pettiq khonhxp tjngnga pjutiq khuilhiq- yok kai, kutyaw boppe yai si theqna Letu hyju nawk khrawng iya khjkke nawk khrawnglheq phë-e cek saba-ai a si.
Kihina somdek hawile cucuva mjitiq sawk kawuvetiq Letu hyju bonglhiq, yxyanglheq kan soi-sën pet bawva, kihi thumcën lhiq yawcu theqna kutyaw boppe dotiq tjng kan djudawng.
"Hummjngkxq nhetiq khui, lonawk dxn na thumcënlheq phi-i yaqtiq khlawng bong bong nghawt khrawng a yung mji/tuawq yaqtiq thing pum nghawt a ljuqve."
Niya Nang Khom Mäq Khrawnglhiq(What You Will Find Here)
Ni site khrawng community members lhiq na thumcënlhiq cxmmetiq khlawnglheq na an petsot khrawng Letu heritage boiqlhiq pxmnawk a si.
Letu Baibel: hihi khraw heritage maq si theqna kihi community lheqa kihi nu-paw be yjng yo-oitiq cimcyalëktiq cawlunglhiq ha sottjuq njn nawk kai tok a poqcai pet.
Articles & Research: Letu hyju bonglhiq kxq lonawk khui, be yok nawk thumlheq, tawq tawk thumcën lheq na thumcën ngjng soyitiq khuilheq jng soiyetiq a thuknawk dxn njngkxq a pawicawva yo-oitiqlheq.
Photos & Videos: Kihi thumcën suiqsawklhiq, community pji poqcai khrawnglhiq, khodeklhiq na khonhxp tjng tun-nguawq, mjiqcoq khrawnglheq puitiq media gallery boiqna sawk hëngtiq bawva kihi thumcën a poq pet.
Somdek Kjng So Nawk (Connecting with the world)
Kihi khrawng dikcaw hxqx nahacä seqe nawk community(bongbawi) ya kan si. Pyanam hawva mji yaqtiq Letu hyju bonglhiq, yxyang na khlawng yxyang ngjng soiyetiq thumcënlheq dukka lung doiqtiq themvatiqlheq na researchers lhiq si theqna i khjkka mji (na) mji, kihi bong phi-yaw dang ti tiq u tomti tok- ni website khrawng kihi soyenawk krawkka a thonne. Yawkcu khrawngna khinyawu(resepct/thing big) mhawn poq theqna khinyawu khrawngna a somlhënne sawk tiyjng kan yum khencuvjng, kihina pumhaw thumcën awuqcek kan phëqe pet.
Ni Yjng Pui Bjiq (Be part of this)
Ni platform khrawng Letu hyju bonglhiq kxqa a thonne. Nang khrawng Letu hyju yxyang tjng ni dxn na kan djudawng. Kihina community member tjngnga photos, khuilheq, khinneba khrawnglhiq(memories) san pet tai hawuve/be-e dawu kan ti, pjnnjngcä tawiyaitiqlheq ha sosui yai, coksawngnge yai na kihi dj khinyawucek krjukhëu, nhiqmin nai djudawng dang kan ti.
